BOL TV

Read this Article about BOL TV

بول ٹی وی اور صحافتی تنظیموں کے خواجہ سراء
وہی ہوا جس کا ڈر تھا، مسلم لیگ ن کی حکومت نے حرام خوران قبیلے سے تعلق رکھنے والے میڈیا مالکان کی سازش کی سرپرستی کرتے ہوئے بول ٹی وی چینل کی ٹیسٹ نشریات بھی رکوا دیں، وہ پیمرا جس کا ہر ممبر کسی نے کسی میڈیا مالک کی دلالی کرتا ہے، وہ بھی فوری طور پر حرکت میں آیا اور نشریات بند کروانے کے نوٹیفکیشن پر عملدرآمد کر ڈالا، ہونا بھی چاہیے تھا کیونکہ اب پاکستانی صحافتی کی تنظیمیں بھی ایسے صحافی لیڈروں کے قبضے میں ہیں جو صحافی کی تعریف پر کم اور چورن بیچنے والوں اور دلالی کرنے والوں کی تعریف پر پورا اترتے ہیں۔
بول ٹی وی کا بند ہونا کسی ایک صحافی، کسی ایک شہری، کسی ایک پروفیشنل کا نقصان نہیں بلکہ پوری قوم، پاکستان کے تمام صحافیوں کا نقصان ہے، ایسا نقصان جس کا خمیازہ پوری قوم اور صحافی برداری کو کئی برسوں تک برداشت کرنا پڑے گا، بالخصوص صحافیوں کے ساتھ میڈیا مالکان وہ سلوک کریں گے کہ لوگ صحافی بننے کی بجائے ریلوے سٹیشن پر قلی بھرتی ہونے کو ترجیح دینگے۔
اس ملک میں جتنے بھی میڈیا کے ادارے ہونگے ، عوام کا اتنا ہی فائدہ ہوگا کیونکہ ظلم برداشت کرتے کرتے جب عوام تھک جاتے ہیں تو دنیا کے ہر ملک میں عوام کی آخری امید میڈیا ہوتا ہے، اگر ایک ٹی وی چینل عوام کے مسئلہ پر آواز نہیں اٹھاتا تو دوسرا اٹھائے گا، دوسرا نہیں تو تیسرا، تیسرا نہیں تو چوتھا یعنی کوئی نہ کوئی میڈیا ضرور نقارہ خلق خدا بنے گا، اسی لئے میڈیا کے زیادہ سے زیادہ ادارے ہونا لازمی تھے مگر اب ایسا نہیں ہوگا۔
اب شاید ہی کوئی میڈیا میں انویسٹمنٹ کرے گا کیونکہ اسے ڈر ہو گا کہ ہلکے کتے کی طرح بول ٹی وی کے پیچھے پڑنے والے میڈیا مالکان اور ان کے دلال اینکرگر میرے پیچھے پڑ گئے تو اچھے یا برے طریقے سے کمائی ہوئی عزت خاک میں مل جائے گی۔ اب شاید ہی کوئی صحافی اپنی مرضی سے خبر دے سکے گا، پہلے ہی اگر کوئی تحقیقاتی خبر دیتا ہے تو میڈیا مالکان اشتہارات کے لالچ میں اس رپورٹر کی خبر رکوا دیتے ہیں، اب میڈیا مالک اپنا اپنا ایجنڈا چلوائیں گے ، رپورٹر پی آر او کا کردار ادا کرے گا اور اس کے بدلے معاوضہ بھی مزدور کی کمائی سے کم ہوگا ۔
بول ٹی وی کیخلاف جو کچھ ہوا وہ ہم صحافی برادری سے ڈھکا چھپا نہیں ہے ، جتنے دن ایگزیکٹ سکینڈل اخبارات اور ٹی وی چینلز پر چلتا رہا، حکومت کیخلاف ایک خبر بھی ٹی وی یا اخبار میں دیکھنے کو نہیں ملی، ٹیکس چوری، فراڈ، جوئے کے اڈوں، قبضے کی زمینوں، مضرصحت اشیائے خوردنوش کی فروخت اور غیرمعیاری تعلیمی ادارے بنا کر کالا دھن کمانے والے تمام میڈیا مالکان کا صرف ایک ہی مسئلہ تھا کہ کسی طرح بول ٹی وی کو آن ایئر ہونے سے روکا جائے۔
بول ٹی وی کیخلاف میڈیا مالکان کی سازشی مہم میں سب سے زیادہ شرمناک کردار پاکستانی صحافتی کی تمام تنظیموں نے ادا کیا ہے، ہزار لعنت ہو تمام صحافی لیڈروں پر جو بول ٹی وی کے دو ہزار ورکروں کو فاقہ کشی کی طرف دھکیلنے کی مہم پر تاحال خواجہ سراؤں کا کردار ادا کر رہے ہیں، کاش تما م صحافتی تنظیمیں بول ٹی وی کے ساتھ فعال طریقے سے کھڑی ہوتیں اور حکومت کی ہر تقریب کا بائیکاٹ کرتیں، پریس گیلریز اسمبلی کی کارروائیوں کا بائیکاٹ کرتیں، ہر صحافی کو موٹی ویٹ کرتیں کہ وہ بول ٹی وی کیخلاف مہم کے دوران اپنے بازو پر سیاہ پٹی باندھ کر ڈیوٹی پر جاتا ، کاش صحافتی تنظیمیں میڈیا مالکان کے ٹاؤٹوں اور دلالوں کا کردار ادا کرنے کی بجائے کسی اہم شاہراہ پر دھرنا دیتیں۔۔ کاش صحافتی تنظیموں کو یہ عقل آ جائے کہ اگر بول ٹی وی نہ آیا تو پہلے سے فرعون بن کر صحافیوں کا خون چوسنے والے میڈیا مالکان کی کوشش ہو گی کہ اب صحافی مریں بھی انہی کی اداروں میں اور ان کی نعشیں انکے ورثاء کے حوالے کرنے کی بجائے میڈیکل کی تعلیم حاصل کرنے والے طلباء کو تجربات کیلئے فروخت کر کے مزید پیسے کما لئے جائیں اور مجھے خوف ہے کہ اب شاید ایسا ہی ہوگا۔
میں پاکستان فیڈرل یونین آف جرنلسٹس کی ایگزیکٹو کونسل کا ممبر ہوں اور میرا ضمیر ہر وقت مجھ پر لعنتیں ڈالتا ہے، مجھے شرم دلاتا ہے کہ ایسی تنظیموں کا عہدیدار بننے کا کیا فائدہ کہ جب تم اپنے ہی حقوق کا تحفظ نہیں کر سکتے تو کسی دوسرے کے حق کیلئے کیاخاک کروگے۔
کراچی کے صحافیوں کو سلام پیش کرتا ہوں کہ وہ بول ٹی وی کے دفتر گئے ان سے اظہار یکجہتی کیا مگر یہ کم ہے، صرف بول ٹی وی کے دفتر جا کر اظہار یکجہتی کرنے سے کام نہیں چلے گا بلکہ اینٹ کا جواب پتھر سے دینا پڑے گا ۔۔ ورنہ۔۔ پوری صحافی برادری آئندہ دس برس اینٹیں کھانے اور فاکہ کشی کاٹنے کیلئے تیار رہے۔۔

میاں داؤد
سٹاف رپورٹر (سٹی فورٹی ٹو ٹی وی لاہور)
0322-4653677